【港豬簡直係最幸福生物】
作為一個擁有廿八年經驗嘅三分鐘熱度革命者
我知道「放棄」從來都係最輕鬆舒服同容易嘅選項
小學時學校突然興起中樂團，我話要學古箏
學咗幾堂，哎呀記譜好難呀，唔學啦。
中學時覺得自己畫畫有啲天份，走去學素描
學咗幾堂，哎呀好悶呀素描，唔學啦。
仲未計一年一次計劃減肥，健康飲食
來來回回廿幾次，至今都仲未成功。
堅持一樣野需要好多成本，好多付出
但係放棄一件事基本上都無咩成本可言。
中學讀過嘅經濟話我知 Let bygones be bygones
過去已使用嘅成本其實並不是成本。
呢幾日喺度諗，喺香港做藍絲做港豬都幾幸福
想食吉野家simplylife元氣(以往我好喜歡)就食，
想食美心就食，想買東海堂蛋糕就買
想去360買平零食又得，想飲珍奶都求其一間入得
星期六日想去邊到玩都去得，番大陸飲喜茶更得。
唔使同親戚朋友絕交，唔使承受失去一個十年朋友之痛
更加唔使每日面對同父母無話可說/鬧交嘅僵局。
藍絲港豬，史上最幸福。
不過今次我唔想放棄。
雖然有時好想食叉燒飯但樓下得美心太興
雖然有時諗起一啲朋友都有啲傷感
雖然我都好想星期六日可以同麥仔行下商場做廢9
雖然每日都諗邊間係黃，邊間係藍好煩惱
雖然無得搭地鐵用多咗好多時間，又要怕塞車
雖然放棄好易，堅持好難。
不過我都係決定唔放棄。
依家個情況就好似見到啲肌肉男日日食雞胸西蘭花
總係有種「做人咁辛苦做咩喎！」嘅感覺
終於明白呢種堅持唔係「攞苦嚟辛」咁簡單
而係做人能夠搵到一樣自己願意付出同犧牲去守護嘅價值
我覺得自己唔再似一頭只識貪嗔癡嘅豬。
何況，今次一放棄，
係放棄緊自己同香港未來幾十年
食少兩舊生蟲壽司又算係咩。
Some People Move On, But Not Us.
**記得Follow埋IG：hkgirlfriend
FB: 港女友
Search